നീയിട്ട മുട്ട തിന്നുമ്പോൾ, കോഴീ,
ആദിമധ്യാന്ത ഭ്രൂണമൊന്നെന്റെ
ആഴത്തിലേറി പിനട്ടിപ്പെറുന്നു:
മു..മു..മുട്ടയോ,
കോഴിയോ...
പിടക്കോഴിക്കു ചുറ്റും തിരിയുന്ന
ഹെയർപ്പിൻ വളവിലൂടെ
ജീവിതമോടിക്കുമരിത്തിപ്പൂവനും
നിവർന്നു കൂവുന്നു:
തെറ്റോ,
ശരിയോ..
പ്രപഞ്ചങ്ങൾ തമ്മിൽ കയർക്കും
ഇലപ്പടർപ്പിലെ ബഹളത്തിലും
തഴമ്പിച്ചു നിൽക്കുന്നു:
ഞാനോ,
നീയോ...
നീ കൊത്തിക്കൊറിച്ച കിനാക്കൾ
നിർത്തിപ്പൊരിച്ചതു
നുണയവേ, കോഴീ,
ഞാനും തികട്ടുന്നു:
ജനനമോ,
മരണമോ...
നീയിട്ട മുട്ട തിന്നുമ്പോൾ, കോഴീ
ആദ്യന്തമില്ലാതൊരേമ്പൊക്കം
അന്തരാളത്തിൽ സഞ്ചരിക്കുന്നു
(നാട്ടുപച്ച.കോം)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ